FANDOM


Seyfi Baba - Mehmet Akif Ersoy - Safahat-0

Seyfi Baba - Mehmet Akif Ersoy - Safahat-0

Bakınız

Şablon:Seyfi Baba - d


Seyfi Baba
Seyfi Baba/Güncel Türkçe
Seyfi Baba/Sade (Aslı parantezde)
Seyfi Baba - Mehmet Akif Ersoy - Safahat
Seyfi Baba/1
Seyfi Baba/2
Seyfi Baba/3
Seyfi Baba/4

Seyfi Baba/Osmanlıca
Seyfi Baba/İngilizce
Seyfi Baba/Arapça
Seyfi Baba/Azerice

Seyfi Baba kimdir?

SEYFI BABA

Seyfi Baba - Mehmet AKif Ersoy - Safahat

Seyfi baba 1
Seyfi baba 2
Seyfi baba 2
Seyfi baba 3
Seyfi baba 4
Seyfi baba 5
ٮسيفى بابا

                                                                                                   

كچن آقشام اوه كلدم. ديديلر:سيفى بابا

خستالانمش، ياتيرمش

نه سى وارمش عجبا؟

بيلمه يز، اوغلو خبر ويردى كچركن بو صباح

كاشكى بن اوده اولايدم.. اسف يتدم، واه واه

بر فنر يوقمى، ويرڭ..نرده صوپام؟ قيز چابوق اول

كجيكيرسه م قاليرم بكله ميك.. زيرا يول

هم اوزون، هم ده باتاقدر

دها اعلا، قاليكز

تيزه كز كلدى، بو آ قشام، دكلز بز يالكز

صوپا صاغ الده،قيريق جاملې فنر صول الده

بوشانان ياغمور ايليكلرده، چامور تا بلده

هانى، چوقدن گومولن قالديريمك، خورتلايه رق

كل ديين طاشلرى قورتارماسه، انسان باته جق

صاقصاغانلر كبى سه كدكچه برندن برينه

بوغويوردم متوفاي بوتون آفرينه

صورماييڭ درديمى، بيتمز مى اوطاشلر، كيدرك

دوشدى آرتيق بزه كوللرده پك اعلا يوزمك

ياقاموزلر صاچه ر ق هر طرفندن فنرم

چيفته صاندال، يوزويوردق، او يوزر، بن يوزرم

چوقمى يوزدك، بيله مم، توپراغى بولدق نه يسه

فنرم باشلادى اطرافنى تك توك حسه

واقعا بن ده يورولدم، او فقط پك يورغون

باقيردم دها مخمورلغى اوستندده اونك:

كاه اولور، كور كبى چارپار صيواسز بر ديواره

كاه اولور مرده شعاعاتى دوشر بر مزاره

كاه بر سقفى چوكوك خانه نك آلتنده قوشار

كاه بر معبد فر سو ده نك أوستندن آشار

وقت اولور پك صپا يرلرده، باقارسك، طولاشير

صوكره اك قورقولى اشخاصه چكينمز صاتاشير

كيجه نك سترهٔ يلداسنى چكمش، عريان

صوقولوب بر صاچاغك آلتنه كويا اويويان

خانمان يوقسولى بيكلر جه سفيلان بشر

سسى دينمش يوالر، خا كه سرلمش أولر

قوجه سندن بو شانان بر سورى بيچاه قارى

او كوپان رابطه نك، دارمه داغان، ياورولرى

ظلمتك، يرير، ايچندن قاباران مزبله لر:

أوى صرتنده، سوقاقلرده كزن عاﺌله لر!

كيجه رهزن، صباح اولماز مى باقارسك، ساﺌل

سرسرى، دربدر،آواره، حرامى، قاتل

بويله قاچ منظره كورديسه بزم كور قانديل

باكا كوسترملى بر كرّه.. نيچون؟ بللى دكل

يا او بيچاره ده رحمت صوي نوش ايليه رك

ختم انفاس ايديويرمز مى همان< جيز> دييه رك؟

او زمان سامعه نك، لامسه نك سوقيله

يوروين كورلره دوندم، او نه دهشتدى هله!

صوپام آرتيق بكا هم كوز، هم آياق، هم ألدى

نه يالان سويله يه يم قلبمه خشيت كلدى

هله ياربى شكر، قارشيدن اوچ دانه فنر

كچيور.. صاچمايه رق طوغرو يورورلرسه اكر

كيده رم آرقالرندن يولي بولدم زاتأ

يولي بولدم دييورم كلمش ايكن حالا بن

ايشته قارشيمده بزم يار قديمك يوردي

باقالم وارمي ايشيق بوقسه محقق اويودي

قاپينك اورتا برندن اوجي دكنكلي بر ايپ

صارقيديلمش اولاجق براوني بولسه م ده چكوب

آچيويرسه م ايي اما قاپي زاتاً آرالق

غالبا بر چيقان اولمش... نه مه لازم٬ آرتيق

كيره رم بن دييه رك كنديمي آتدم ايچري

آياغمدن چيقاروب لاستيكي كچدم ايلري

صاغه دوندم آزيجق كيتمه دن اوچ بش باصاماق

مرديوه ن كلدي كه زورجه يدى براز طيرماتمق

صوله دوندم اوطه نك اسكي شاياق پرده سني

آرالاركن قولاغم طويدي فقيرك سسني:

-نرده قالدك؟ بني هيچ يوقلامادك اولادم!

حقليسك بنده قباحت كه خبر يوللا مادم

بيليرم چوقدر ايشك صوكره بزم يول پك اوزون

هله ديڭله ن آزيجق٬ آكلاشيلان يورغونسڭ

بر كت ويرسون آتش قويدي دمين قومشو قادين

اوشويورسه ڭ٬ اشيوير مانغالي؛ اش اش ده ايصين

اوطه نك لوشلغي قسوت اويرييور پك٬ باقدم

شوفنز يانسه دييوب بر قوطو كبرت چاقدم

هله صوك كبريتي طوتدمده ياقيندن يوزينه

سر مه چكمش كبي نورايندي مومك كور كوزينه

او زمان نيم آچيلوب پردهٔ ظلمت ناكاه

كوردي بر صحنهٔ عريان سفالت كه نكاه

شا عر اولسه م ينه تصويرى اولور بنجه محال

او پريشانلغى درپيش ايده مز چونكه خيال

چكه رك ديزلرينك اوستنه بر اسكى عبا

سورونوب مانغاله ياقلاشدى بزم سيفى بابا

-اخلامور ويردى دمين قومشو..بوله يدق شونى، بر..

-سن اوطور، بن آرارم -اولسه ايچردك، اييدر.

آها بولدم، آرامق ايسته مز اوغلم، كيتمه

بنده بر قارنى كنيش جزوه كچيردم ألمه

باشلادم قايناده رق ويرمه يه فنجان فنجان

آزيجق كلدى بزم اختيارك بكزينه قان

-شمدى آكلات باقالم، نه يدى سنك خسته لغك؟

نزله اولدك صانيرم، چونكه بو قيش پك صالغين.

-محمد آغانك اوى آقمش. اونى آقطارمق ايچون

طامه چيقدم، صوغوق آلدم، اوليور اون بش كون

-نه ايشك وار كيره ميدلرده آ سرسم- ديسه ڭه

اختيارلقمى نه در، شاشقينم اوغلم بو سنه

هادى آقطارمايه يم.. كيم كتيرير اكمكمى؟

اوطوروب كور كبى، نامرده ال آچمق اييمى؟

كيم قازقنمازسه بو دنياده بر اكمك پاره سى

دوستنك يوز قاره سى؛دشمننك مسخره سى

يوقسه يتمش بشى كچمش بر آدام ايش ياپه ماز

اوكا آنجق ياپه جق: بش وقت آ بدستله نماز

خسته لاندم، باقه جق كيمسه جكم يوق؛ عثمان

كيجه كوندوز قوشيور ايش دييه، بيلمم نه زمان

الى اكمك طوته جق! ايشته ساعت بلكه ده اوچ

كورييورسك دها كلمز.. يالكزلق پك كوچ

بعضى بر هفته كچر اوغرايان اولمز يانمه

كيمسه سزلك بوسفر طاق ديدى آرتيق جانمه

سنى بر ترلته يم صيم صيقى اورتوب بو كيجه

آچيلرسك، صانيرم، ترله مش اولسه ك اييجه

اختيارخ ترله يه طورسون كومولوب يورغاننه

آته رق بنده كنيش بر كبه منغال ياننه

باشلادم اويقو تحريسنه لكن نه كزر

صيزمشم بر آرالق نه يسه يورولمشده مكر

اورتالق آچمش اوياندم. ديدم، آرتق كيده يم

اوكجه اما شو فقير آدمى ممنون ايده يم

برده باقدم كه: تك اونلق بيله يوقمش كيسه ده

مهرم بويننى بوكمش طورويرمش ساده

او زمان قوپدى ايچمدن شو تحسر ابدى:

يا حميتسز اوله يدم، يا پاره م اولسه ايدى     

Community content is available under CC-BY-SA unless otherwise noted.